ഊബറിലും ഓലയിലും ഓട്ടോകൾക്ക് മീറ്റർ ചാർജ് ബാധകമല്ല; അനീതിയെന്ന് ബെംഗളൂരുവിലെ തൊഴിലാളികൾ; പണിമുടക്കിലേക്ക്

ബെംഗളൂരു: സംസ്ഥാനത്ത് ഓട്ടോറിക്ഷകൾക്കും ഡിജിറ്റൽ മീറ്ററുകൾ നിർബന്ധമാക്കാനുള്ള ഗതാഗത വകുപ്പിന്റെ നീക്കത്തിനെതിരെ ഓട്ടോ - കാബ് ഡ്രൈവർമാരുടെ സംഘടനയായ ഫെഡറേഷൻ ഓഫ് കർണാടക സ്റ്റേറ്റ് പ്രൈവറ്റ് ട്രാൻസ്പോർട്ട് അസോസിയേഷൻ. ഊബർ, ഓല തുടങ്ങിയ അഗ്രിഗേറ്റർ ആപ്പുകൾ സർക്കാർ നിശ്ചയിക്കുന്ന വാടക നിരക്ക് പാലിക്കണമെന്ന് അവർ ആവശ്യപ്പെട്ടു. ഇതുനു ശേഷം മാത്രമേ ഡിജിറ്റൽ മീറ്ററുകൾ നിർബന്ധമാക്കാൻ പാടുള്ളൂ എന്നും സംഘടന ആവശ്യപ്പെട്ടു.

ആപ്പ് അധിഷ്ഠിത അഗ്രിഗേറ്റർ കമ്പനികൾക്ക് സർക്കാർ നിശ്ചയിച്ച യാത്രാനിരക്കുകൾ പാലിക്കേണ്ടതില്ലെന്ന സ്ഥിതിയാണ് നിലവിലുള്ളത്. തിരക്കേറിയ സമയങ്ങളിൽ സർജ് പ്രൈസിംഗ് അടക്കമുള്ളവ നടപ്പാക്കി ഉയർന്ന ചാർജ് ഈടാക്കുന്നു. ഇത്തരം സമീപനങ്ങൾ അവസാനിപ്പിക്കണമെന്ന് ഓട്ടോ-കാബ് ഉടമകളുടെ സംഘടന പറയുന്നു. തിരക്കുള്ള സമയങ്ങളിൽ 'സർജ് പ്രൈസിങ്' എന്ന പേരിൽ ഉയർന്ന നിരക്ക് ഈടാക്കുകയാണ്. തിരക്കില്ലാത്തപ്പോൾ നിരക്ക് വൻതോതിൽ കുറയ്ക്കുകയും ചെയ്യുന്നു. ഈ സമീപനം കമ്പനികൾ അവസാനിപ്പിക്കണം.

പുതിയ ഡിജിറ്റൽ മീറ്റർ ചട്ടം നടപ്പിലാക്കുന്നതിന് മുൻപ് അഗ്രിഗേറ്റർ കമ്പനികളെ വിളിച്ചുവരുത്തി സർക്കാർ നിരക്കുകൾ മാത്രമേ ഈടാക്കൂ എന്ന് രേഖാമൂലം ഉറപ്പ് സർക്കാർ വാങ്ങണമെന്ന് സംഘടന ആവശ്യപ്പെടുന്നു. ഡിജിറ്റൽ മീറ്റർ ഘടിപ്പിക്കണമെന്ന ചട്ടം പാലിക്കാത്ത കമ്പനികളുടെ ലൈസൻസ് റദ്ദാക്കണം.

അഗ്രിഗേറ്റർ കമ്പനികൾ യാത്രക്കാർക്ക് ബുക്കിങ് സൗകര്യമൊരുക്കുകയും, അവർക്ക് ഡിജിറ്റൽ മീറ്റർ ബില്ലുകൾ നൽകുകയും മാത്രമാണ് വേണ്ടത്. മീറ്റർ നിരക്കിലെ മുഴുവൻ തുകയും ഡ്രൈവർമാർക്ക് നേരിട്ട് ലഭിക്കണമെന്നും സംഘടന ആവശ്യപ്പെട്ടു. 2016-ലെ അഗ്രിഗേറ്റർ ചട്ടങ്ങൾ അനുസരിച്ച് കമ്പനികൾക്ക് 5% കമ്മീഷനും ജിഎസ്ടിയും ഈടാക്കാൻ അനുവാദമുണ്ട്. ഇതിൽ കൂടുതൽ തുക ഈടാക്കരുത്. 36 രൂപ മിനിമം നിരക്കിൽ 5% കമ്മീഷൻ നൽകാൻ ഡ്രൈവർമാർ തയ്യാറാണെന്നും സംഘടന പറഞ്ഞു.

സർക്കാർ മുൻപ് നടപ്പാക്കിയ വെഹിക്കിൾ ലൊക്കേഷൻ ട്രാക്കിങ് ഡിവൈസ് ഘടിപ്പിക്കലും, പാനിക് ബട്ടണുകൾ ഘടിപ്പിക്കലുമെല്ലാം ഡ്രൈവർമാർക്ക് വലിയ സാമ്പത്തിക ഭാരമാണ് വരുത്തിവെച്ചതെന്ന് സംഘടന ചൂണ്ടിക്കാട്ടി. മറ്റ് സംസ്ഥാനങ്ങളിൽ 4,000 - 5,000 രൂപ നിരക്കിൽ ലഭിക്കുന്ന ഇത്തരം ഉപകരണങ്ങൾക്ക് കർണാടകയിൽ 11,000 വരെ ഈടാക്കിയതായി സംഘടനയുടെ പ്രസിഡന്റ് എസ് നടരാജ് ശർമ്മ ആരോപിച്ചു. ഇനി വരാനിരിക്കുന്ന ഡിജിറ്റൽ മീറ്റർ പദ്ധതിയും സമാനമായ മറ്റൊരു അഴിമതിയായി മാറരുതെന്ന് അദ്ദേഹം കൂട്ടിച്ചേർത്തു.